Sulamente nu punto

Na sfida, chesta cu 'o Pescara, jucata cchiu' 'ncoppo 'e panchine dinte 'e juorne passate ca 'ncoppo 'o S.Paolo. Na rivalita', chella tra Novellino e Galeone, ca nun tene limite manco 'ncoppo 'e parole. Anzi 'o cchiu' capintesta, galeone, a pure spustate nu poco cu 'a vocca. Nun sta bene, nun s'agisce accussì. Ddoje partite, ve steva dicenne: una 'ncoppo 'e panchine e n'ata mmiezo 'o campo fra ddoje squadre cu 'e stessi punte in classifica e cu dduje allenatore ca poco tenane a che spartere. 'E Galeone nuje a Napule tenimme belli ricorde: chi se po' scurda' quanne acchiappava chelli scarecatre 'e pallune 'e tiempe 'e Maradona. Ogge 'o Napule e' de n'ata manera, chesto nun se po nega', ma va 'o stesso aiutato e sustenuto cu 'o core. Si, chesta partita s'aveva vencere pe forza. Tre punte dinte a stu mumento do campionato songhe care comme ll'oro. Aveva essere nu zumpo ca 'nce faceva respira' ll'aria fresca da classifica aveta. Ma tant'e', 'nce purtamme sulamente nu punto e poco cagna. 'Ngoppo 'o S.Paolo 'nce stevane paricchi perzune pure si 'a serata era frischetta. Na nuvola 'e fummo fatte cu 'e botte poco faceva vede'. Pochi cavece vicine 'o pallone e 'o Pescara cerca subbeto 'e premmere annanze. Dinte a pochi minute avevane battute ggia' dduje calcio d'angolo. Occasione n'avimme pure nuje: Turrini sul'isso e Bardoni se fa para' nu gol fatto menannele 'o pallone mmiezo 'e braccia. Ma a vintiseje minute e' semp'isso, Schwoch, ca n'approfitta 'e na alliscita 'e palla 'e Gregori 'ncoppo a nu passaggio 'e Turrini, votta 'o pallone dinte 'a rezza. Uno a zero, pare ca 'a partite se mette bbona pe nuje. ma a fernetura 'e primmo tiempo Gregori appara 'e cunte cu nu tiro 'e potenza ca Bandieri nu po' piglia'. Nu peccato, visto comme avimme jucate ll'urdema mez'ora. 'O sicondo tiempo trase Nilsen 'o posto 'e Sbrizzo ca era asciuto zuppechianne. Doppo poco esce pure Lombardi pe fa posto a Stellone: Novellino mette na ponta pe raffurza' ll'attacco, ma nun ce sta niente 'a fa. Cchiu' 'e na vota chilli marpiune mettane fuori gioco a Schwoch e paricchi occasione nun venane sfruttate comme si deve. 'Nce ne servevane tre, 'nce ne purtamme uno sulamente.
Stateve bbuono.
by Umberto de Fabio